Your cart is empty now.
राष्ट्रीय शैक्षणिक धोरण 2020 नुसार व्यावसायिक कौशल्य अभ्यासक्रमासाठी (VSC) सावित्रीबाई फुले पुणे विद्यापीठाने सन 2026-27 या शैक्षणिक वर्षापासून तृतीय वर्ष कला (टी.वाय.बी.ए.) या वर्गासाठी लागू केलेल्या अभ्यासक्रमानुसार ‘पर्यटन भूगोलाची ओळख व सहल नियोजनाची प्रात्यक्षिके’ हे पुस्तक लिहिण्यात आले असून ते विद्यार्थी आणि प्राध्यापक बंधू भगिनींच्या हाती सुपूर्त करतांना आम्हास अतिशय आनंद होत आहे. अलीकडील काळात बहुतेक देशांच्या सकल राष्ट्रीय उत्पन्नातील पर्यटनाचा वाटा वाढला असून आज पर्यटन ही जागतिक स्तरावरील एक महत्त्वाची आर्थिक क्रिया बनली आहे. ही बाब विचारात घेऊन सावित्रीबाई फुले पुणे विद्यापीठाच्या भूगोल अभ्यासमंडळाने या विषयाचा पदवी स्तरावरावरील अभ्यासक्रमात समावेश केला आहे.
भूगोल विषयाच्या विद्यार्थांना पर्यटन क्षेत्रातील भूगोलाचे महत्त्व समजून देण्याच्या दृष्टीने पर्यटन क्षेत्रातील जाणकार, अभ्यासक, व्यावसायिक, संशोधक यांच्याशी सखोल चर्चा करून तसेच पर्यटनाशी निगडीत संदर्भ ग्रंथ, नियतकालिके, इंटरनेटवर उपलब्ध असलेली माहिती, वर्तमानपत्रातील लेख, अहवाल, चर्चासत्रे, परिषदा, शोध निबंध यांचा आधार घेऊन सदर पुस्तकाचे लिखाण करण्यात आले आहे. पर्यटन, पर्यटक यांच्या व्याख्या, पर्यटनाचे स्वरूप, व्याप्ती व महत्व, पर्यटनावर परिणाम करणारे प्राकृतिक, सामाजिक, सांस्कृतिक तसेच राजकीय घटक, पर्यटनाचे वर्गीकरण, पर्यटन विषयक संकल्पना, नियोजन व धोरणे या घटकांचा पुस्तकाच्या लिखाणात समावेश करण्यात आला आहे.सहल नियोजनाची प्रात्यक्षिके यामध्ये सहल नियोजन, सहलीचे प्रकार, सहल नियोजनाचा आरखडा, सहल पॅकेजचा खर्च आणि अंदाजपत्रक, प्रवासाची कागदपत्रे आणि आरक्षण प्रक्रिया तसेच अभ्यास सहलीचा अहवाल लेखन या घटकांचा समावेश केला आहे.
