मुल्ये मानवतावादावर, मानवधिकाराच्या संकल्पनेवर आधारीत आहेत. लोकशाही तत्वज्ञानातून समाजकार्याची मूल्ये उदयास आली आहेत. समाजातील प्रत्येक व्यक्तीने सुस्थितीत जगले पाहिजे. शोषित, वंचित, पिडीत, अभावग्रस्त कोणीही राहू नये ही त्यामागची भावना आहे. सामाजिक न्यायाची भावना, मानव कल्याणाची भावना यामागे आहे. व्यक्तीसहाय्य कार्याच्या मुल्यांना मानवी संस्कृतीचा व मानव सभ्यतेच्या संकल्पनेचा आधार आहे. व्यक्तीनुसार समाज बनत असल्याने आणि समाजानुसार व्यक्ती वर्तन करीत असल्याने व्यक्तीच्या वर्तनाला, विचारांना, आचारांना, दृष्टीकोनाला सामाजिक वातावरणातील, समाजातील घटना आणि घटक प्रभावित करतात.
समाजकार्याचे अभ्यासक्रमाचे विषय हे सामाजिक जाणीव व सामाजिक उपयुक्ततेवर आधारलेले असतात. ते सामाजिक गतीशिलतेची व विकासाची आधारशिला असतात. परंतु यातील बहुतांशी पुस्तकं इंग्रजी भाषेत असून मराठी भाषेतील पुस्तकांची संख्या तशी कमीच आहे. ती अडचण दूर करण्याच्या दृष्टीकोनातून एका महत्वाच्या विषयावर अभ्यासपुर्ण लिखाण मांडण्याचा प्रयत्न सदरील पुस्तकात केला आहे.